မှတ်တိုင်သစ်များနဲ့ အစပြုမယ့် ၂၀၁၉


မင်္ဂလာအပေါင်းနဲ့ပြည့်စုံပြီး ပျော်ရွှင်စရာကောင်းတဲ့ နှစ်သစ်ဖြစ်ပါစေလို့ ဆုမွန်ကောင်း ပို့သအပ်ပါတယ်။ အားလုံးလည်း ၂၀၁၉ ခုနှစ်ကို အကောင်းဆုံးစတင်နေပြီလို့လည်း မျှော်လင့်ပါတယ်။

ကျွန်တော်တို့ NYDC အနေနဲ့ ၂၀၁၈ ခုနှစ်ကို အလွန်အရေးပါတဲ့ မှတ်တိုင်သစ်တစ်ခုနဲ့ အဆုံးသတ်ခဲ့ပါတယ်။ ရန်ကုန်မြို့သစ်ရဲ့ Master Plan ပထမအဆင့်နဲ့ စပ်လျဉ်းတဲ့ အလုပ်ရုံဆွေးနွေးပွဲ (visioning workshop) ကို ဒီဇင်ဘာလအတွင်းမှာ ပြုလုပ်ခဲ့ပါတယ်။ ဒီအလုပ်ရုံဆွေးနွေးပွဲကို ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်း၊ ရန်ကုန်မြို့တော်စည်ပင်သာယာရေး ကော်မတီအဖွဲ့ဝင်များ၊ မြန်မာနိုင်ငံဗိသုကာအသင်းနှင့် မြန်မာနိုင်ငံအင်ဂျင်နီယာအသင်းတို့မှ အဖွဲ့ဝင်များ၊ NYDC နဲ့ သက်ဆိုင်သူများနှင့် အခြားဖိတ်ကြားထားသော ဧည့်သည်တော်များ တက်ရောက်ခဲ့ကြပါတယ်။

NYDC က စီစဉ်တဲ့ ဒီအလုပ်ရုံဆွေးနွေးပွဲမှာ AECOM မှ ရန်ကုန်မြို့သစ်ရဲ့  Master Plan ပထမအဆင့် မူကြမ်းကို တင်ပြဆွေးနွေးခဲ့ပါတယ်။ ဒီ Master Plan ပထမအဆင့် မူကြမ်းကို Royal Haskoning DHV က ရေးဆွဲထားတဲ့ မဟာဗျူဟာကျ ရေလွှမ်းမိုးမှုဆိုင်ရာ အကဲဖြတ်ချက် (Strategic Flood Risk Assessment)၊ Oriental Consultants က ရေးဆွဲထားတဲ့ ယာဉ်ကြောပိတ်ဆို့မှုနှင့်လမ်းပန်းဆက်သွယ်မှု စီမံရေး အကဲဖြတ်ချက်(Traffic & Transport Planning) တို့က လေ့လာတွေ့ရှိမှုတွေကို ပေါင်းစည်းပြီး ရေးဆွဲထားပါတယ်။

နောင်အနာဂတ်  ရန်ကုန်မြို့သစ်ကို ပုံဖော်ပေးမယ့် ဒီ Master Plan ဟာ NYDC အတွက် အရေးကြီးတဲ့ အဆင့်ဖြစ်ပါတယ်။ Master Plan ပထမအဆင့်မူကြမ်းကို ရှင်းလင်းတင်ပြခဲ့တဲ့ ဒီအလုပ်ရုံဆွေးနွေးပွဲဟာ သွက်လက်တဲ့ ဆွေးနွေးပွဲတစ်ခုဖြစ်ခဲ့ပြီး တက်ရောက်လာသူတွေထံက အကြံဉာဏ်ကောင်းတွေ အများကြီးရရှိခဲ့ပါတယ်။ ရန်ကုန်တိုင်းဒေသကြီးဝန်ကြီးချုပ်အနေနဲ့လည်း တက်ရောက်လာသူတွေရဲ့ မေးမြန်းချက်တွေဖြစ်တဲ့ ရေကြီးရေလျှံမှု၊ ရေအရင်းအမြစ်နှင့် ဇီဝဂေဟစနစ် (ecological system) ကို တိုးတက်မြင့်မားစေရေး၊ မြို့ကြီးတွေမှာ အများနားနေနိုင်တဲ့နေရာများ ဖော်ထုတ်နိုင်ရေး အစရှိတဲ့ မေးခွန်းတွေကို တက်ကြွစွာ ပြန်လည်ဖြေကြားခဲ့ပါတယ်။

ရန်ကုန်မြို့သစ် Master Plan ရေးဆွဲခြင်းကို AECOM နဲ့ အခြားသက်ဆိုင်ရာကဏ္ဍအလိုက် အကြံပေးတွေလည်း ဆက်လက်လုပ်ဆောင်လျက်ရှိပြီး နောက်လာမယ့်ရက်သတ္တပတ်တွေ အတွင်းမှာ မူကြမ်းဒုတိယအဆင့် ထွက်ရှိလာမှာ ဖြစ်ပါတယ်။ Master Plan အပြီးသတ် ရေးဆွဲပြီးတဲ့အခါမှာ Town Hall တစ်ခုပြုလုပ်ပြီး final Master Plan ကို ရှင်းလင်းတင်ပြပြီး အကြံပြုချက်တွေကို ထပ်မံတောင်းခံသွားပါမယ်။ Master Plan ရေးဆွဲခြင်းနဲ့ တစ်ချိန်တည်းမှာပဲ ကနဦးအခြေခံအဆောက်အအုံ ဆောက်လုပ်ရေးလုပ်ငန်းတွေအတွက် ပထမအကြိမ် NYDC Challenge ကို ဖေဖော်ဝါရီလလယ်ပိုင်းအချိန်မှာ စတင်နိုင်အောင် ကြိုးစားနေပါတယ်။

Invest Myanmar Summit 2019

၂၀၁၉ ခုနှစ်၊ ဇန်နဝါရီလ (၂၈-၂၉) ရက်နေ့ နေပြည်တော်မှာ ပထမဆုံးအကြိမ်ကျင်းပမယ့် Invest Myanmar Summit (IMS) 2019 မှာ ရန်ကုန်တိုင်းဒေသကြီးအစိုးရအဖွဲ့နဲ့အတူ ရန်ကုန်မြို့သစ်စီမံကိန်းလည်း ပါဝင်မှာဖြစ်ပါတယ်။ Invest Myanmar Summit 2019 ကို မြန်မာနိုင်ငံရင်းနှီးမြှုပ်နှံမှုကော်မရှင် (MIC)၊  ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန (DICA) နဲ့ ပြည်ထောင်စုမြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI) တို့ စီစဉ်ပြီး ပြည်ထောင်စုမြန်မာနိုင်ငံတော်အစိုးရ၊ ပြည်နယ်နှင့်တိုင်ဒေသကြီးနဲ့ စီးပွားရေးအဖွဲ့အစည်းတို့ ပူးပေါင်းကျင်းပတာဖြစ်ပါတယ်။ ဒီ Invest Myanmar Summit 2019 ကို  နိုင်ငံတကာနဲ့ ပြည်တွင်းရင်းနှီးမြှုပ်နှံသူများအတွက် မြန်မာနိုင်ငံမှာ စီးပွားရေးလုပ်ကိုင်နိုင်မယ့် အခွင့်အလမ်းတွေကို ရှာဖွေတွေ့ရှိစေနိုင်ဖို့ ရည်ရွယ်ပြီးပြုလုပ်တာဖြစ်ပြီး အမေရိကန်ဒေါ်လာ (၃)ဘီလီယံကျော် တန်ဖိုးရှိတဲ့ ဒေသနှင့် ပုဂ္ဂလိကစီးပွားရေးစီမံကိန်းပေါင်း ၁၂၀ ကျော်မှ ပါဝင် ပြသသွားမှာ ဖြစ်ပါတယ်။

ရန်ကုန်မြို့သစ်စီမံကိန်းဟာ Invest Myanmar Summit မှာ  ရန်ကုန်တိုင်းဒေသကြီးအစိုးရအဖွဲ့အနေနဲ့ ပြသသွားမယ့် စီမံကိန်းအချို့ထဲက တစ်ခုဖြစ်ပါတယ်။ ဒီ summit မှာ NYDC အနေနဲ့ ရန်ကုန်မြို့သစ်အတွက် ရင်းနှီးမြှုပ်နှံမှုရှာဖွေနေတဲ့ ကဏ္ဍတွေဖြစ်တဲ့ အများပြည်သူသုံး လမ်းပန်းဆက်သွယ်ရေး(Public Transport) ၊ မြို့တော်သန့်ရှင်းရေးနှင့် အမှိုက်သိမ်းစနစ် (Municipal Waste) ၊ Convention Centre နဲ့  ဆက်သွယ်ရေး(Telecommunication) တို့ကို အဓိက ရှင်းလင်းပြောကြားသွားမှာ ဖြစ်ပါတယ်။

Invest Myanmar Summit 2019 ရဲ့ အပိတ်ဆွေးနွေးပွဲမှာ ကျွန်တော့်အနေနဲ့ NYDC ကို ကိုယ်စားပြုပြီးတော့ ပါဝင်သွားမှာဖြစ်ပါတယ်။ အခုအချိန်ကာလဟာ နိုင်ငံရဲ့စီးပွားရေးဖွံ့ဖြိုးမှုအတွက် နိုင်ငံခြားရင်းနှီးမြှုပ်နှံမှုတွေကို ဆွဲဆောင်နိုင်ဖို့ အလွန်အရေးကြီးတဲ့ အချိန်ဖြစ်ပါတယ်။ နိုင်ငံရဲ့ အခြေခံအဆောက်အအုံတည်ဆောက်ရေးကအစ ကုန်ထုတ်လုပ်ခြင်းကဏ္ဍမြှင့်တင်နိုင်ရေး၊ လယ်ယာစိုက်ပျိုးရေးကဏ္ဍရဲ့ နည်းပညာတိုးတက်မြင့်မားရေး၊ နိုင်ငံ့ပိုကုန်မြှင့်တင်ရေး၊ ပညာရေးစနစ်အဆင့်မြှင့်တင်ရေး၊ ကျန်းမာရေးဝန်ဆောင်မှု တိုးတက်မြင့်မားရေး အစရှိတဲ့ ကဏ္ဍအားလုံးမှာ တာဝန်ယူမှုရှိတဲ့  နိုင်ငံခြားရင်းနှီးမြှုပ်နှံမှုက ရရှိလာမယ့် အကျိုးကျေးဇူးတွေ၊ အားသာချက်တွေကို အသုံးချခြင်းနဲ့ မြန်မာနိုင်ငံကို ပိုမိုတိုးတက်ကောင်းမွန်အောင် တည်ဆောက်သွားနိုင်မှာ ဖြစ်ပါတယ်။ ဒါကြောင့်မို့ မြန်မာနိုင်ငံကို ပြည်ပရင်းနှီးမြှုပ်နှံမှုတွေအတွက် ဆွဲဆောင်နိုင်တဲ့ နိုင်ငံအဖြစ်အသွင်ပြောင်းနိုင်အောင် ရည်ရွယ်ပြီး  “ပုဂ္ဂလိကကဏ္ဍ၏အမြင် – မြန်မာနိုင်ငံသို့ နိုင်ငံခြားရင်းနှီးမြှုပ်နှံမှုများအား ဆွဲဆောင်ခြင်း” ခေါင်းစဉ်နဲ့  ကျွန်တော်ပါဝင်ဆွေးနွေးသွားမှာ ဖြစ်ပါတယ်။

NYDC အနေနဲ့ ၂၀၁၈ ခုနှစ်အတွင်းမှာ ရန်ကုန်မြို့သစ်စီမံကိန်းအတွက် အရေးပါတဲ့လုပ်ဆောင်ချက်တွေ လုပ်ဆောင်နိုင်ခဲ့သလိုပဲ ၂၀၁၉ ခုနှစ်မှာလည်း ရန်ကုန်မြို့သစ်ရဲ့ ရည်မှန်းချက်ဖြစ်တဲ့ အလုပ်အကိုင်အခွင့်အလမ်းသစ်(၂)သန်းကို အမြန်ဆုံး အကောင်အထည်ဖော်နိုင်အောင် ပွင့်လင်းမြင်သာမှုအပြည့်နဲ့ ဆက်လက်ကြိုးစားသွားပါမယ်။ ဇန်နဝါရီလ (၂၈) နဲ့ (၂၉) ရက်နေ့ နေပြည်တော်မှာ ကျင်းပမယ့် www.investmyanmar2019.com ကို တက်ရောက်ကြဖို့လည်း အားလုံးကို ဖိတ်ခေါ်ချင်ပါတယ်။

လေးစားစွာဖြင့်

သိမ်းဝေ@Serge Pun

Related Posts

မြို့ပြဖော်ထုတ်ရေးကျွမ်းကျင်ပညာရှင်များနှင့် ချိတ်ဆက်ခြင်း

2019 Urban Land Institute Asia Pacific Summit ညီလာခံကို ဇွန်လ (၁၁)ရက်နေ့ကနေ (၁၃)ရက်နေ့အထိ တရုတ်နိုင်ငံ၊ ရှန်ဟိုင်းမြို့မှာ ကျင်းပခဲ့ပြီး ကျွန်တော်ဦးဆောင်တဲ့…Read more

ရန်ကုန်မြို့သစ်၏ Master Plan

ရန်ကုန်မြို့သစ်ရဲ့ Master Plan ကို AECOM အဖွဲ့က စည်းစနစ်အကျဆုံး၊ထိရောက်မှုအရှိဆုံး၊ အလေအလွင့်အနည်းဆုံး မြေကိုအသုံးချနိုင်ဖို့အတွက်သာမက တည်ဆောက်အကောင်အထည်ဖော်မယ့် လိုအပ်နေတဲ့အခြေခံအဆောက်အဦတွေ၊ စီးပွားရေးဖွံ့ဖြိုးတိုးတက်မှု၊ ပတ်ဝန်းကျင်စီမံခန့်ခွဲနိုင်မှု၊ သယ်ယူပို့ဆောင်ရေး၊ လူမှုရေးနှင့်…Read more

ရန်ကုန်မြို့သစ်ကို ဟန်ချက်ညီညီနဲ့ စဉ်ဆက်မပြတ် ရေရှည်ဖွံ့ဖြိုးစေရေး

ရန်ကုန်မြို့သစ်စီမံကိန်းရဲ့ ပတ်ဝန်းကျင်လေ့လာဆန်းစစ်ရေးနယ်နိမိတ်တွေကို ချမှတ်နိုင်ဖို့ NYDC အနေနဲ့ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန လက်အောက်မှာရှိတဲ့ ပတ်ဝန်းကျင်ထိန်းသိမ်းရေး ဦးစီးဌာနက သက်ဆိုင်ရာ ကျွမ်းကျင်ပညာရှင်တွေ၊ တာဝန်ရှိသူတွေနဲ့ ဆွေးနွေးမှုတွေကို ၂၀၁၈ခုနှစ် နှစ်လည်ပိုင်းမှစတင်ပြီး…Read more

ရန်ကုန်မြို့သစ်နှင့် စိုးရိမ်မှုများ

၂၀၁၉ ခုနှစ် မတ်လ(၆)ရက်နေ့မှာ NYDC ရဲ့ ဒုတိယအကြိမ် Townhall ကို ပြုလုပ်ခဲ့ပြီး တစ်ချို့လည်း လူကိုယ်တိုင်တက်ရောက်ခဲ့ကြသလို တစ်ချို့လည်း NYDC Facebook စာမျက်နှာကနေ…Read more

ရန်ကုန်မြို့သစ်ပထမအဆင့် အခြေခံအဆောက်အအုံ တည်ဆောက်ရေးလုပ်ငန်း(၆)ခုအတွက် တင်သွင်းထားသော EOI များ

၂၀၁၉ခုနှစ်၊ ဖေဖော်ဝါရီလ (၁၁)ရက်နေ့မှာ ရန်ကုန်မြို့သစ်ပထမအဆင့် အခြေခံအဆောက်အအုံ တည်ဆောက်ရေးလုပ်ငန်း(၆)ခုအတွက် NYDC Challenge Tender ပထမအဆင့်စတင်နိုင်ဖို့ လုပ်ငန်းဆောင်ရွက်လိုမှုအဆိုပြုလွှာ (Expression of Interest –…Read more

Town Hall – 6 March, 2019

NYDC ရဲ့ ပထမဆုံး Town Hall ဆွေးနွေးပွဲကို ၂၀၁၈ ခုနှစ် ဇွန်လမှာ ပြုလုပ်ခဲ့ပြီး အခုဆိုရင် (၉)လတာ ကြာမြင့်ခဲ့ပြီ ဖြစ်ပါတယ်။ အဲဒီအချိန်ကစပြီး…Read more